• Новости

    Галима апа Калимуллинага 90 яшь

    АНАНЫҢ ТӨП БАЙЛЫГЫ

    Бәзәкәдә гомер кичерүче Галимә Кәлимуллина 90 яшен билгеләде. Юбилярны район башлыгы урынбасары Ләйсән Галеева, ветераннар Советы рәисе Любовь Сорокина, җирлек башлыгы Ильмир Кашафетдинов тәбрикләделәр. 

    Аның сугыш белән өтелгән балачагы колхоз кырларында үтә. 
    – Барыбызга да бердәй авыр иде, – дип исенә төшерә ветеран. – Ачлык, ялангачлык, туганнарыбызны һәм якыннарыбызны югалту ачысын кичердек. Минем абыем Шәех та яу кырында башын салды. Безне, бәдәннәре дә ныгымаган кызларны, бригадалап урман эшләренә җибәрәләр иде. Кыенлыклар безне чыныктырды, бер генә үкенечем калды – белем ала алмадым. 
    Галимә апаның хезмәт биографиясе 1994 елга кадәр, лаеклы ялга чыккач та дәвам итә. Г.Кәлимуллина I һәм II дәрәҗә «Ана даны», «Хезмәт ветераны» медальләре белән бүләкләнгән. 
    Галимә Гыймазетдиновна үзен бәхетле әни һәм дәү әни дип исәпли – аны алты баласы, ун оныгы кайгырта, җиде оныкчыгы әбиләрен чиксез ярата. 
    – Без үскәндә йорт мәшәкатьләре һәрберебезгә тигез бүленгән иде, – дип сөйли кызы Зәмфирә, – әни тегермәндә эшләде, соң кайта иде. Әмма аннан ипи исе килеп торган тойгы безне бүгенге көнгә кадәр озата бара. 1986 елда авыру әтиебезне аямады, әни аны алты ел тәрбияләде. Без, биш кызы һәм бер улы, башыбызны иеп кадерле кешебезгә барысы өчен дә «Рәхмәт!» дибез. 
    – Безнең әби аның төп байлыгы булган искиткеч балалар үстерде, – дип дәвам итә кияве Илдар, – хәзер тулы хокук белән оныкларының һәм оныкчыкларының уңышларына шатлана. 
    Галимә Гыймазетдиновна кунакларга җылы котлаулары һәм бүләкләре өчен рәхмәт әйтте. 
    – Сезгә бары тик уңышлар, сәламәтлек һәм оптимизм юлдаш булсын, – диде ветеран, – минем 95 яшемдә очрашырга язсын!

                                                                                                            Менделеевск хәбәрләре, 2018 ел, март

                                       Әниебезнең юбилее

                                                                                                                                                Туган көне бүген әниемнең

                                                                                              Туксан ел ул яши дөньяда.

                                                                                              Матур үзе, җыерчыклы йөзе,

                                                                                              Чәчләре чал ап-ак булса да.  

                                                                                              Алты баласына бүлеп биргән,

                                                                                              Йөрәгенең бөтен ялкынын.

                                                                                              Безнең күз алдында картайды шул

                                                                                              Киң күңелле әнием алтыным.  

                                                                                              Тарсынма әле әнием бу дөньяны

                                                                                              Сыкранма әле әнием авыр дип.

                                                                                                               Яшә әле яшә, озак яшә,

                                                                                            Бер киткәчтен кайтып булмый ул.

          Безнең әниебез (без аны әнәй дибез) Кәлимуллина Галимә  Гимазетдин кызы 1928 нче елның 27 мартында Бондюг районы (хәзерге Менделеев районы) Бәзәкә авылында гаиләдә икенче бала булып дөньяга килә. Әтисе  Гимазетдин Бондюг пристанендә йөкләр бушата,әнисе Миннебаян колхозда эшли. Абыйсы Шәех та әтисе янында эшли.

          Әнигә 13 яшь булганда, Бөек Ватан сугышы башлана.Ул башкалар белән көнне төнгә ялгап колхоз кырларында эшли. Абыйсы  фронтка китә, шунда һәлак була.

           1950 нче елны әтиебез Минәхмәт белән гаилә коралар. Алар бергә бик күп сынаулар аша үтәләр. Биш баласы  тугач ук үләләр.

            Еллар үтә. Кәлимуллиннар гаиләсендә бер бер артлы биш кыз һәм бер малай туа. Әниебез хөкүмәтнең  1,2 дәрәҗәле  Аналар медальләре белән бүләкләнә.  Балалар кечкенәдән үк эш сөеп үсәләр. Алар арасында укытучы,тәрбияче,сатучы һәм башка һөнәр ияләре бар. Бүгенге көндә әнинең  алты баласы,ун оныгы,җиде оныкчыгы бар.

            1986 елны гаиләгә зур кайгы килә - әтиебезне паралич сугып урын өстенә ега. Әниебез аны алты ел буена карап,соңгы юлга озатты.

            Әни гомер буена колхозда эшләде. Лаеклы ялга чыккач та,эшен ташламый.1994 нче елга кадәр тегермәндә эшли. Хөкүмәтебез әнине тырыш хезмәте өчен “Хезмәт ветераны” һәм юбилей медальләре белән бүләкләде.Бүгенге көндә кече кызы белән төп йортта яши.

           “Балачак-шук чак”, диләр. Безнең дә төрле чакларыбыз булгандыр. Зинһар өчен,әни,безне кичерә күр. Син безне кешеләргә карата шәфкатьле,ягымлы булырга,һәркемгә ярдәм кулын сузарга әзер торырлык итеп үстерергә тырыштың. Озын гомерле булып,уңышларыбызга сөенеп яшә, әнием!                                                               Гилязова Ләйсән, 2018 ел, март

     

    тулырак

    Талтиннар- Күчәгәрләр нәселе









    Адрес: 423648, Республика Татарстан, Менделеевский район, с. Бизяки. Самое родное село в мире.
    Расположение села: правый берег р. Кама, до Набережных Челнов-37км, до Казани-250км, до Ижевска-160км

    Яндекс.Метрика
    Поделиться